Tuesday, February 7, 2017

MID UUN DOORTA WAXBA ISMA DHAAMAANE!!!

Murashaxiinta u tartamaya Xilka Madaxweynaha Soomaaliya waxay gaarayaan 23 Murashax, tiradaas wey ka badnaan lahaayeen hadii aysan kalaaban rag iyo dumar aan bixin lacagta diiwaan gelinta oo gaareysa $30,000 kuna dhawaaqay in ay ka hareen tartanka.

Muddo Saddex maalin ah waxaa la dhageystay Hadal-Jeedintii Murashaxiinta xilka u tartamaya, murashax walbana wuxuu ka hadlay waxqabadkiisa inta uu xilka madaxtinimada Soomaaliya hayo, dhammaantood 23-ka musharax wey soo jeediyeen, mid walbana wuxuu qaatay waqtigii loogu talagalay, mid walibana isagoo isku haysta murashaxii ugu Hadal-jeedinta wanaagsanaa ayuu ka hor wareegay Xildhibaanadii dhagaha siiyay

Murashaxiintii ugu horeysay ee la dhageystay waxay nasiib u yeesheen in si wanaagsan loo dhageysto Xildhibaanadana ay fadhiyeen intooda badan, kuwii u dambeeyayna laga kala yaacay oo aanan la dhageysan Hadal-Jeedintooda, walow dhanka Anshaxa kalfadhiga la jabiyay sida uu caddeeyay Guddoomiyaha Baarlamanka Federaalka Soomaaliya Mudane Maxamed Shiikh Cusmaan Jawaari "Sacbiska iyo buuqa waa ka mamnuuc kalfadhiga golaha baarlamanka, ee yaan la jabin sharciga" sidaa waxaa in badan ku soo celceliyay Guddoomiye Jawaari.

Waxaa la sameeyay Guddi loogu talagalay ANSHAXA kaasoo uu Guddoomiye ka yahay Prof.Cabdi Ismaaciil Samatar, guddigaasi waxay ka hadleen furitaankii Soo jeedinta Murashaxiinta, ujeedooyinka loo aas aasayna waa baahi dhanka Anshaxa ah oo la dareemay, iyadoo ay ku dadaalayaan guddigaas cusub in ay howl wanaagsan qabtaan iyo sidoo kale wacyi galinna u sameeyaan Xubnaha Golaha Baarlamanka Federaalka Soomaaliya.

Madaxdii kala duwaneed ee nasiibka u yeelatay in la dhageysto waxay ka sinaayeen dhammaantood dhaliisha siyaasadda Dowladda hadda waqtigeedu sii dhamaanayo ee Mudane Xassan Shiikh Maxamuud uu Madaxweynaha ka yahay, inkastoo uusan jirin Murashax mid kale oo murashaxiinta kamida ammaanaya haddana 22-ka murashax dhammaantood mid waliba wuxuu dhaliilay Siyaasadda gaarka ah ee Xasan Shiikh.

Haddana waxay ku kala duwanaayeen cidda ay u soo jeedinayaan in Xildhibaanadu doortaan, oo Murashax walba wuxuu yiri "Aniga hala i doorto anigaa amniga wax ka qabanayee", "Aniga hala idoorto anigaa dhammaantiin Xajka idin geynaya", "Anigaa wax ka qabanaya Cudurka Kaduudiyaha". "Anigaa sidii Gobolka Benaadir oo kale idiin maamuusayee", "Aniga i doorta xubnaha iyo jagooyinka ugu muhiimsan dumarka ayaan siinayaaye", "Aniga i doorta waxaan noqon doonaa Nabad-doon, ee ma noqon doono Madaxweyne".

Mudane Madaxweyne Xasan Shiikh Maxamuud oo isagu doorashadii tan ka horreysay la yimid Lix Tiir oo dowladdiisu ku dhisnaan doonto waxna uu ka qaban doono, wuu badalay maanta wuxuuna soo jeediyay ama kusoo gaabiyay 3-Tiir, taasoo dadka dhaliila ay yiraahdeen "Lixda tiir markii ay ku badatay ayuu iska kala yareeyay Saddex tiirna ku soo gaabsaday".

Haddaba Shacabka oo sugayay doorasho Qof & Cod ah ayaa waxaa taa beeniyay ama joojiyay Madaxweyne Xasan isagoo sheegay in xilligan aysan suuragal ahayn doorasho Qof & Cod ah, baddalkeedana laga dhigo Doorasho Dadban, taasina waxay kamid tahay dhaliilaha Madaxweynaha loo soo jeedinayo, waxayna yiraahdeen dadka kasoo horjeeda fikirkaa "Madaxweynuhu wuxuu rabaa in uu soo laabto, si uu usoo laabto waa in uu isagu soo xushaa Xildhibaanno doorta, intii dadka codkooda la weydiin lahaa".

Guud ahaan aragtiyadaa kala duwan iyo Murashaxiintaa faraha badan waxay ku tusineysaa in aan laga sinneyn baadi goob mideysana aan loogu jirin sidii ay dowlad soomaaliyeed oo sharaf leh kusoo laaban lahayd, musuq maasuqii la tilmaamayna uu meesha ka muuqdo, tiiyoo ay jirto in dad badani ay aaminsan yihiin in faragalin shisheeye ay meesha ku jirto oo waddamo badanina ay u xusul duubayaan sidii ay usoo saari lahaayeen shaqsi ay iyagu taageersan yihiin lana rabaan in ay la shaqeeyaan.

Isku soo duuboo hadalka macnihiisa runta ah wuxuu noqonayaa doorashada Maalinta Siddeedaad ee Bisha Labaad sanadkan aynu ku jirno, wuxuu noqon doonaa mid dadku mahdiyaan, ama mid aan waxba ka duwaneyn waddadii aanu ku soo jirnay tan burburkii dowladdii Kacaanka, oo dad badani ay aaminsan yihiin dowladdaa wixii ka dambeeyay in aan la helin dowlad dadku ku diirsadeen.

Waxaana hubaala in dalka iyo dadkuba uusan helin kii ay ku diirsan lahaayeen 1991-kii wixii ka dambeeyay, waxaanse ku soo gabagabeynayaa Qormadayda anigoo la hadlaya Xildhibaanada lasoo doortay ee Siddeeda Febaraayo ku ballansan in ay doortaan Hoggaamiye ay Umadda Soomaaliyeed yeelato: 
MID UUN DOORTA WAXBA ISMA DHAAMAANE!!!

Magacyo badan ayaa baxay intii uu socday ololaha doorashada waxaana kamida: 

  • Nin wax qabyeeyay Wax ma qaban.
  • Nin dhul bixiyay oo Badda baadi goob kusoo helay
  • Nin Baddeena bixiyay Barri kuma aamini karno
  • Nin Boobay Hantidii Qaranka Beentiisa marabno
  • Murashax Hebel hala doorto waxay ka dhigan tahay dadku Gadaal-Gadaal ha u socdaan.
Inkastoo intaa iyo inkasii badanba la isku weydaarsanayay Baraha ay bulshadu ku xiriiraan ee Aaladda Intenet ka haddana intaa uun ayaan kasoo qaatay anigoo iska ilaaliyay in shaqsi magaciisa aan sheego, dadkuna ii arkaan in aan dhinac ka ahay ololaha murashaxiinta qaarkood loo sameynayo.

Waad ku mahadsantahay Booqashada Blog-gan

Qormadii: Iman Mohamed Jim'ale
Mogadishu-Somalia.
Hand phone: 00252 61 5189092 (Somalia, Online)
Official E-mail: imanjimale@gmail.com
Facebook: Facebook.com/Iman Jimale

Posted by at 2 comments:

Saturday, February 4, 2017

YAAN REERKIINNU YURUB KU YARAAN!!!

Dalka Soomaaliya waxa uu dhacaa Juqraafi ahaan Geeska Africa, waxaa ku nool umad la isku raacay in dhammaantood ay haystaan Diinta Islaamka, islamarkaana aan u ogoleen Qof Soomaali ah oo haysta Diin kale in uu ku noolaado Soomaaliya meel kamida (Dhuumaaleysi mooyee), sidoo kale waxaa la tilmaamaa in ay tahay ummad isku dhaqan ah inteeda badan (Oo goob walboo lagu soo bandhigo xeerka iyo dhaqanka umadda soomaaliyeed waxaad ku aragtaa in ay isku mid yihiin amaba isku dhaw yihiin intooda badan), sidoo kale waa ummad ku hadasha luqadda Soomaaliga inkastoo lahjado kala duwan ay leedahay luqaddaas, 

Haddaba dhulka umaddaa Soomaaliyeed waxa uu leeyahay Kheyraad farabadan oo uu ilaahay ku manneystay, cimillo aad u wanaagsan oo isugu jirta qabow, kuleyl, dabeyl iyo huur ayuu leeyahay dhulka soomaaliyeed, sidoo kale dhulku wuxuu isugu jiraa dhul buura-ley ah, dhul ban ah, dhul dhagaxaantu ku badan tahay iyo Carro nuucyo badan leh oo ay kamid tahay (Dhoobada), wax soo saarka dhulkaasna waxaa la tilmaamaa in uu aad u wanaagsan yahay.

Marka la tilmaamayo kheyraadka dhulka soomaaliyeed waxaa la sheegaa in ay yihiin uranium, iron ore, tin, gypsum, bauxite, copper, salt iyo natural gas. balse Kheyraadka ugu muhiimsan ee ay soomaalidu leedahay waa (DHALLIN-YARO) kheyraadkaa isaga ah waaa mid la guranayo marba marka ka dambeysa, qaabka gurashada waqtigan waa uu ka duwan yahay gurashadii hore.

Dhallinyaradii Soomaaliyeed waxaa loo billaabay TAHRIIB oo runtii noqday dhibaato umadda soomaaliyeed oo dhan wada saameysay meel kasta oo ay ku nooshahay, Wiilka ama Gabadha dhallinyarada ah ee Soomaaliyeed waxaa laga dhaadhiciyay in ay dhoofaan, intooda badan fikir ahaan wey wada aaminsan yihiin in dhulkan la isaga haajiro oo dhul kale la tago, qaar baa waddankii ka tagay oo waxay aadeen Africa meel kamida oo ay sanado ku nool yihiin, sidoo kale qaar ayaa u dhaqaaqay Asia, kuwo Euro ayey mareeen iyagoo badda jeexay, sidaas oo kale USA ayey kuwo kalena aadeen.

Inta badan dhallinyarada waxaa laga dhaadhiciyay Dhimasho iyo Dhoof mid uun in ay doortaan in ay tahay lama-dhaafaan, sidaas ayey dhallinyaro badan oo qoysaskoodu dhaqaalo haysteen u direen ubadkooda iyagoo ku qarash gareeyay sidii ay u TAHRIIBI lahaayeen, Sheeko layaab leh oo dadku ku sheekeesanayeen xilligii ugu xumaa ee saameynta TAHRIIBKU soo if baxay ayaa waxay ahayd sidan: waxaa la is weydiiyay inta badan waalidiintu maxay u taageeraan in ubadkoodu TAHRIIBAAN?

Hooyo Soomaaliyeed ayaa la sheegay in ay TAHRIIBISAY ubadkeeda in badan oo kamida, waxayna tiri "sababta ugu weyn ee aan u tahriibiyay waxay ahayd Islaan saaxiibtay ah ayaa bisha markii ay dhamaato waxay igu tiraahdaa kaalay Xawaaladda ii raac, lacag baan ka soo qaadanayaa oo ilmahayga ii soo direen, markii aan raaco ee ay lacagta kasoo qaadato Xawaaladda ayey waxoogaa Shaah lagu naynaaso isiisaa oo ay itiraahdaa naa intan waa shaahaagee qaado!!! markaas ayaan weydiiyay cidda usoo dirta lacagta waxay ii sheegtay ubad ay dhashay oo ku nool yurub waa horana qaxoot-nimo loo aqoonsaday ayaa ii soo dira bishii lacag!!!" Hooyadii ayaa aamintay in ay muhiim tahay in ubadkeeda ay u dirto Yurub, si allaala iyo sidii ay ku qaadan lahayd iyo waddadii ay u mari lahaydba waxay isku dayday arrintaa in ay ka guul gaarto oo ubadkeeda u dirto Yurub, damacaas ku dhasha waalidka iyo sidoo kale kuwo kale oo aan ka fogeyn oo caruurta tahriibaysa naftooda ku dhalata ayaa sabab u ah in dhallinta la tahriibiyo.

Kheyraadkii umadda ee Dhallinyaradiina waxaa loogu yeeray in ay Yurub iyo Mareekan iska soo diiwaan galiyaan dacwad inta loo furo ayaa qaar diyaarado lagu qaadaa, tiiyoo ay jirto waliba kuwa wada dhashay oo xaflad aroos inta ay sameysteen ku dacwooday in ay is qabaan yurub iyo africana lakala joogo, waxa intaa loo sameenayana ay tahay YAAN REERKAAGU YURUB KU YARAAN!!!

Dhallinta ka gudubta Badda ee nolosha u raadsata Yurub iyo Mareekan waxaa la siiyaa Guri ay dagaan cunto iyo lacag ay reerahooda u diraan, lacagtaasi waxaa lagu magacaabaa CAYR oo macnaheedu yahay ha shaqeysan (Sida ay dadka qaar u fasirteen, illeen waa shaqo ha u kalihin, waxaad cuntana waa lagu siin).

Waad ku mahadsan tahay Booqashada Blog kan.

Thanks.
Iman Mohamed Jim'ale
Mogadishu-Somalia.
Hand phone: 00252 61 5189092 (Somalia, Online)
Official E-mail: imanjimale@gmail.com
Facebook: Facebook.com/Iman Jimale


Posted by at No comments:
Location: Mogadishu, Somalia
Subscribe to: Posts (Atom)