HALKU-DHIG YADA NOO DHAMMEYSTIRA!

Halku-dhig yada aadka loo isticmaalo xilliyada Doorashada dalkeena waxaa kamida: Ku dooro: MIDNIMO, CADDAALAD & HORUMAR.
MIDNIMO in ay naga maqan tahay waa run, oo Somaliland gooni ayey utaagan tahay, nidaamkii Federaalka ee la qaatayna si fool xun ayaa loo fasairay oo gobolladii dalka oo awoodo is diiddan ah ayaa kala maamula, mid walibana wuxuu leeyahay Madaxweyne xukunka iyo talada cid kale in ay la wadaagto uusan ogoleyn!
CADDAALAD la'aan in ay dalka ka jirto oo garsoorkana la isku halleyn karin qof walba wuu qiraa, waana sababta loogu beer-laxawsado kuwa codeeya ee fursaddaas helay in lagu yiraahdo waxaan idiin sameeneynaa Caddaalad, maadaama ay ka maqan tahay dadkoo dhan ayna baadi goob ugu jiraan sidii ay caddaalad ku heli lahaayeen!

HORUMAR badan ma jiro marka laga reebo in yar oo ku saabsan dhismaha waddooyinka dalka qaar hayeeshee dhinacyada ugu badan ee horumarka in laga sameeyo u baahnaa weli looma siqin dhinacaas oo horumar la'aan ayaa jirta!
Xulashadii Xildhibaanada Dowlad Goboleedyada gaar ahaan DG Galmudu ayaa soo dhaw, in badan dhallinyaradii waxay sameysteen Boorar lagu soo xarriiqay halku-dhig yada aan kor kusoo sheegay "Xildhibaan da' yar ku dooro midnimo, caddaalad iyo horumar" waxaana laga reebay ku dooro musuq maasuq la'aan iyo in codkiisa uusan lacag ku badalan, halka ugu habboona uu dhigi doono!
Haddii aan run la isku sheegin arrini sidii la rabay ma noqoto, sidii la jeclaana haba sheegin, waxaa habboon xulashada Xildhibaanada in loo maro hab hufan, si doorashada madaxtinimada ee ku xigtana ay u hagaagto, qofkii loo baahnaana loo helo. WAA IGA TALO!

Iman Mohamed

MAALINTA CAALAMIGA AH EE AKHRIS-QORAALKA.

Sawirka: Maalinta Caalamiga ah ee Akhris/Qoraalka

Sanad kasta maalinta 8-aad ee September waxaa loo dabaal dagaa maalinta caalamiga ah ee wax Akhris-Qoraalka.
Shirkii Guud ee #UNESCO 26 October 1966-dii la qabtay waxaa la go'aamiyay in Akhris-qoraalka maalin loo sameeyo. Laga soo billaabo 1967 -dii ilaa maanta waxaa si joogto ah loo xusaa sanad kasta Maalinta Caalamiga ah ee Akhris-Qoraalka International Literacy Day (ILD) si loo xasuusiyo dadweynaha muhiimadda ay leedahay akhris-qoraalka.
Ka sokow inaan ogaanno maalintan sababta loo dooray, waxaa muhiim ah in aan is weydiinno muhiimadda ay leedahay wax qorista, iyo haddii bulshadeenu ay haysato wacyi galin ku filan oo ku aaddan maalintan Caalamiga ah.
Adduunka waxaa looga hadlaa in kabadan 7,000 (Toddoba kun) oo luqadood, luqaddeena (Af-Soomaaliga) haddii aysan ku jirin kaalinta ugu hooseysa waxay kamid tahay kuwa ugu hooseeya ee aan la hormarin sanadihii u dambeeyay.
Bulshada soomaaliyeed inta afkooda qori karta waa in kooban oo aad uga yar tirada guud ee Soomaalida oo lagu qiyaaso 15.000,000 (Shan iyo toban malyan) mana haystaan wacyi galin ku filan oo sare u qaadi karta in ay hormariyaan Qorista afkooda hooyo.
Meertada nolosha ee la iska dhaxlo, horumarka looga daydo dadkii kaa horreeyay iyo diiwaan gelinta taariikhaha fog ee uu dalku leeyahay waxaa lama huraan u ah Qorista, waana muhiim in la ilaaliyo sarena loo qaado wacyiga Akhris-Qoraalka (Literacy) bulshadeenna.
#InternationalLiteracyDay2019 #MaalintaCaalamigaEeAkhrisQoraalka #Somalia