Kufsiga iyo Heerka uu gaaray!

Dunidan aynu ku nool nahay meelo badan oo kamida waxaa ka dhaca tacaddiyo ka dhan ah xuquuqda bani'aadamka, ma jiro waddan aysan ka dhicin maalin ama bil kasta qeyb kamida dhibaatooyin loo geysto dad aan waxba galabsan.

Afrika iyo guud ahaan qaaradaha kale ee dunida waxaa si is daba-joog ah loogu geystaa dadka nugul ee tabarta daran tacaddiyo ay kamid yihiin in la dhaco hantidooda, dhiiggooda la daadiyo iyo weliba in lagu xad gudbo dumarka oo loo geysto Kufsi iyo fara-xumeyn!

Soomaaliya waxaa lagu tiriyaa waddamada safka hore uga jira tacaddiyada ay ka midka yihiin KUFSIGA, iyadoo aan loo kala saarin caruur iyo dad waa weyn! waxaana inta badan kufsigu uu ka dhaca magaalooyinka waa weyn ee leh bulsho aad u tiro badan.

Sanadkan aynu ku jirno 2020 waxaa dalka soomaaliya ka dhacay kiisas badan oo Kufsi ah kuwaasoo noqday kuwii ugu halista badnaa, waxaa la dhigay isbitaalada caruur la xaday kaddibna la iska soo tuuray iyagoo la kufsaday, waxaa kale oo la diiwaan galiyay Rag kufsi ugeystay rag kale!

Toddobaad ka hor waxaa Baarlamanja JFS la keenay xeer ku saabsan Galmoodka oo ay wasiiradda haweenka iyo xuquuqul insaanka keentay baarlamanka si looga doodo, waxayna sababtay doodda in ay gaarto meel halis ah, inkastoo la siyaasadeeyay sida ay qabaan qaar kamida bulshada haddana xeerkan oo laga akhriyay baarlamanka hortiisa ayaa la iska diiday gabi ahaanba iyadoo wasiiraddii soo gudbisay lagu dhaleeceeyay waxa ay soo qortay oo ay bulshada iyo baarlamankaba hor keentay!

Murankaas iyo doodda dhex socotay toddobaad baraha ay bulshadu ku xiriirto waxaa bar-bar socday falalka kufsiga oo isla bishan aan ku jirno gudaheeda gabar dugsiga sare dhammeysay sanadkan ayaa inta la xoogay dabaq laga soo tuuray, sidoo kalena waxaa isbitaal la dhigay gabar laga keenay dhul mii ah taas oo la kufsaday, markii wax laga qaban waayay kaddibna muqdisho la keenay si loo daweeyo.

Bulshada ku dhaqan magaalada muqdisho iyagoo ka dhiidhinaya dhibaatadaas ayey dhigeen isu-soo baxyo lagu muujinayo in laga soo horjeedo tacaddiyada ka dhanka ah dumarka ee Kufsiga la xiriira, culimada ayaa iyaguna inbadan waxay ku cel celiyaan in dhibaatadaas laga hortago, dowladda ayaase ka gaabisay oo kaalinteedii ayaa meesha ka maqan.

Dhaqan ahaan ma ahan wax soomaalidu ay ku soo dhex jirtay kufsigan joogtada ah balse waxaa uu sii if baxay 30-kii sano ee u dambeysay, iyadoo dhulka miiga ah xitaa uu gaaray kufsiga! Sida looga hortagi karo dhibaatadan waa in bulshada inteeda wanaagsan iyo dowladduba ay iska kaashadaan sidii looga wada shaqeyn lahaa arrintan, xukunka kufsigana aan la fududeen sida ku qoran kitaabka qur'aanka.

 W/Q: Ìman Mohamed | Iman Gurey 

MARXALADDA KALA-GUURKA IYO MURAN SIYAASADEEDKA DALKA!

Tan iyo wixii ka dambeeyay burburkii dalka ka dhacay sanadkii 1991-kii waxaa jiray dowlado kumeel gaar ah kusoo billowday markii dambana isku badalay dowlad rasmi ah sanadkii 2012 -kii.

Soomaaliya afartii sanaba mar ayey gashaa xaalad siyaasadeed oo qasan, waxaana sabab u ah doorashada madaxtinimo ee afartii sanaba mar la qabto, taasoo dadka qaarkii ku abuurta in dib loogu laaban doono xilligii adkaa ee dagaallada sokeeye.

Laga soo billaabo xilligii madaxweynihii hore ee Soomaaliya Mudane Cabdullaahi Yuusuf Axmed oo lagu soo doortay dalka Kenya waxaa dowladdiisii ay ku soo shaqeysay magaalooyinka Baydhabo, Jowhar iyo Muqdishu, waxaana ragaadiyay muran iyo khilaaf siyaasadeed, muddo xileedii dowladdaasi markii ay sii dhammaaneysay waxaa dalku uu galay xaalad siyaasadeed oo qasan!

Madaxweyne Cabdullaahi Yuusuf iyo Ra’iisulwasaarihii xilligaas talada hayay AUN Nuur Cadde ayaa is qabtay, waxayna sababtay in shir la isugu yimaado dhinacyada saamileyda siyaasadda oo kala ah Isbahaysigii Casmara ee uu hoggaaminayay Shariif Sheikh Axmed iyo Dowladdii KMG ahayd, shirkaasi oo ka dhacay Jabuuti waxaa lagu soo doortay madaxweyne Shariif Sheikh Axmed, madaxweynihii talada hayayna wuxuu ku dhawaaqay Ra’iisulwasaare cusub, inkastoo aan la aqoonsan, ugu dambeyntiina wuu is casilay AUN madaxweyne Cabdullaahi Yusuf!

Madaxweyne Shariif Sheikh Axmed markii ay kasii dhamaaneysay muddo xileedkii dowladdii uu hoggaaminayay waxaa billowday is qabsi kale oo sababay in Ra’iisulwasaarihii xilligaa xafiiska maamulayay ee Maxamed Cabdullaahi Farmaajo lagu qasbo in uu is casilo, muddo sanad ahna loogu daro dowladdaasi, waxayna taasi keentay in doorasho rasmi ah ay ka dhacdo dalka gudihiisa, waana markii laga baxay KMG. 

Madaxweyne Xasan Sheikh Maxamuud dowladdii uu hormuudka ka ahaa isna kama duwaneen kuwii isaga ka horreeyay, khilaafaadka iyo Ra’iisulwasaare badalka kala mid ayuu ahaa kuwii hore, muddo xileedkii dowladdiisiina 6 bilood ayey dhaaftay, doorashadii lagu rajo weynaa ee ahayd in qof iyo cod ay dhici doontana waxaa baddalay doorasho dadban, inkastoo lagu soo gabagabeeyay jawi qurxoon oo dowladdii cusbayd talada uu ugu wareejiyay si Dimuqraadi ah.

Madaxweynaha talada haya ee Maxamed Cabdullaahi Farmaajo oo la saadaalinayay in badan in uu ka duwanaan doono madaxdii kale ee ka horreysay, mar dhaw ayuu jidkii kusoo dhacay, waana markii xukuumaddii saddex sano iyo bar jirtay, toban daqiiqo wax ka yar mooshin la’aan la riday, iyadoo lagu eedeeyay in aysan waxba qaban!

Dalku malahan Ra’iisulwasaare rasmi ah, balse waxaa xafiiska maamule ka ah ku-sime lasoo shaqeeyay xukuumadda kalsooni la’aanta kusoo dhacday markii muddo xileedkeedii uu ka harsan yahay 6 bilood. Ku-simahaasi wuxuu saaxiib dhaw la yahay Madaxweynaha dalka, wuxuu joogay toddobaad markii uu ansixiyay sharciyo xayirnaa intii ay shaqeeneysay xukuumadda, taasina waxay keentay tuhun badan oo ku saabsan halka ay wax u socdaan, iyo in hal qof uu ka yeelanayo sidii uu doono.

Markii la gaaro marxaladda kala-guurka dalka waa u caado in muran siyaasadeed xoog leh uu ka billowdo siyaasiyiinta dhexdooda, waxaa shiraya beelaha, maamul goboleedyadana laba shir oo isku xigta ayey ku galeen dhuusamareeb, mid kalena waa lagu madal sanyahay, murankiina wuu socdaa oo Ra’iisulwasaarihii goob joogga ka ahaa shirkii hore maanta lama hayo, kii lagu baddali lahaana baadi goobkiisii ayaa socda!

Dadka u dhuun daloola siyaasadda soomaaliya waxay leeyihiin haddii beesha caalamku aysan ku dhex jiri lahayn, kaalmada Bangiga adduunkana aysan jiri lahayn, ciidamo nabad ilaalin ahna aysan joogeen soomaaliya waxaa qarka loo saarnaan lahaa in lagu dhaco godkii hore ee dowlad la’aanta, kaasoo markii horeba ay go’aankooda iyo ficilkoodaba ugu dhaceen umadda soomaaliyeed.

W/Q: Ìman Mohamed | Iman Gurey

TIYAATARKA QARANKA SOOMAALIYEED (The National Theater)

Anigoo ah arday, balse ku taxan dhageysiga Raadiyaha ayaan idaacaddii Horn Afric ee muqdisho ka howl gali jirtay ka dhageystay xayeysiiska Riwaayad la doonayay in lagu dhigo golihii murtida iyo madadaalada Tiyaatarka Qaranka Soomaaliyeed, waxaa naloo sheegay in riwaayadda loogu talagalay Ardayda Gobolka Benaadir, dadweynuhuna ay irdaha u furan yihiin, taasoo macnaheedu ahaa in Bilaash lagu daawan doono!

Maalmaha fasaxa ee Khamiis iyo Jimco maadaama lagu soo aaddiyay riwaayadda, waxaan maalintaas galinikii hore u dabaal tagnay aniga iyo saaxiibaday xeebtii Curubo oo xilligaas ahayd xeebtii ugu badan ee loo dabaal tagi jiray inkastoo ay jireen xeebo kale oo dabaasha loo aado, markaan soo dabaalanay kaddib ayaan xaruntii tiyaatarka oo bubur ka muuqdo xaggeedii soo abbaarnay aniga iyo saaxiibadii aan wada soconay.

“Dahab lumay ninba si u doon-doon” ayey ahayd magaca riwaayaddaas, fariinta ay gudbinaysay iyo macnaha ay xambaarsaneed inta badan ardaydu kama aysan war-qabin, hayeeshee majaajiliistayaasha aadka u maaweelinayay maalintaas dadka waxaa kamid ahaa Aw-daango oo ku jilayay doorka Nacasnimada, wiil ay dhashay walaashiis oo Hor-gal ahaa ayey u dhiibtay hooyadii, waxayna u sheegtay in uu bannaanka ku soo tuuro si reerkooda aysan fadeexad ugu reebin.

Aw-daango oo ballantii hooyadii oofinaya ayaa intuu soo xambaartay wiilkii uu Abtiga u ahaa dariiqa soo dhigay, kaddibna Booliska ayaa arkay oo gacanta ku dhigay, markii lagu soo eedeeyay falkii xumaa ee lagu qabtay ayuu afka furtay “Anigu nacas baan ahaa, inanka abti baan u ahaa, eedda Ayeeyaa lahayd!!!” ayuu ku cataabay.

Riwaayaddaas oo dhan nuxur haddii uu ku jiray intaas ayaan ka xasuustaa, waxay ahayd maalintii iigu horreysay iiguna dambeysay ee aan Tiyaatarka qaranka dhex fariisto, weliba isagoo kor ka feydnaa, kuraas la’aan aawadeedna Jaran-jaradii salka lawada saartay, dhibkaa aan maalintaas u marnay iyo waxa aan soo fiirsanay isma lahayn, kaliya uun waqtigii ayaan ku luminay, waxaase ku rooneyn haddii uusan qarashna nooga bixin baashaalkaas cabsida watay maadaama ay ku beegneed xilligii hoggaamiya kooxeedyada la is qafaalan jiray!

Muddo kaddib isagiyoo la tirtiray lana rinjiyeeyay, kor iyo hoosna laga daboolay, meel kasta oo dalooshayna la cufeeyay, dowladda hadda jirtana ay ku baaqday in si isxilqaan ah lagu dhiso ayaa ugu dambeyntii xariga laga jaray, waxa loo dig iyo dam leeyahayna waa in mar kale lagu billaabo caweyskii uu caanka ku ahaa, xarig jarka goobtana waxaa lagu daray goobo taariikhi ah oo ay dowladdu ku faaneyso, munaasabadda 1-da luuliyo ayaana lagu soo beegay oo ah maalintii ay xoreebeen gobollada koonfur islamarkaana ay midoobeen gobolladiii waqooyi iyo kuwa koofureed ee ingiriiska iyo talyaanigu kala gumeysan jireen.

W/Q: Ìman Mohamed | Iman Gurey

Maalinta Afrika (Munaasabad aan la Maamuusin)

Maanta waxay ku asteysan tahay Maalinta Afrika, inbadan dadka qaaraddan u dhashay aad uguma dabaal dagaan, waxay ka jecel yihiin maalmaha xorriyadda ee u gaarka ah dal kasta oo Afrika kamida. Maalinta Afrika (Africa Day) waxaa horay loo oran jiray maalinta xorriyadda Afrika (Freedom Day / African Libration Day) waa xus sanadle ah ee uu aasaaskiisu lahaa Ururka Midowga Afrika, waxaana la aas aasay 25/May/1963.

Munaasabaddan waxaa xus sanadle ah looga sameeyaa qaar kamida dalalka Afrika oo aan badneen. Shirweynihii 1-aad ee waddamada Afrika ee madaxa bannaanaa waxaa lagu qabtay magaalada Accra ee dalka Ghana 15 April 1958. shirkaasi waxaa isugu yeeray Ra'iisulwasaarhii Ghana ee xilligaas Dr.Kwame Nkrumah. Shirkaasi wuxuu noqday kii ugu horreeyay ee lagu qabto cidda Afrika oo ay gumeyste farabadan dul dhoobnaayeen gees ka gees qaaradda Barwaaqada ah ee Afrika.

Shirkani wuxuu muujinayay horumarka dhadhaqaaqa xoreynta ee qaaradda Afrika, wuxuu calaamad u ahaa go'aanka shacabka Afrika in ay ka xoreeyaan xukunka shisheeyaha iyo ka faa'iideysiga. Golaha Pan-Afrika ayaana ka shaqeenayay arrintaa tan iyo muddo aad u fog oo laga soo billaabo aas-aaskiisa.

Shirkaas ayaa lagu baaqay in la sameeyo Maalinta Xorriyadda Afrika oo noqoneysa maalin sanad walba loo dabaal dago, si loo xaqiijiyo loona socdo hormarka ka socda dhaqdhaqaaqa xoreynta iyo in ay astaan u ahaato go'aaminta dadka Afrika in ay ka xoreeyaan xukunka shisheeyaha .

Sidaas ayaa lagu aas aasay maalinta loo yaqaan Maalinta Afrika (Africa Day)

W/Q: Ìman Mohamed | Iman Gurey

WANLA-WEYN DAD LA QALAY OO LAGUBAY AYEY DIIWAAN GALISAY!!!

Meyd Xaabo dusha laga saaray, kaddibna dab la qabad siiyay!!

Magaalada Wanla-weyn ee ka tirsan gobolka Shabeelaha Hoose waxay hoos tagtaa maamulka Koonfu Galbeed ee deggan caasimadda kumeel gaarka ah ee Baydhabo, dhawaan waxaa la wareegay ciidamada dowladda soomaaliya, waxayna kala wareegeen kuwa ururka Al-shabaab ee ka dagaallama Soomaaliya.

Dhawaan waxaa ka dhacay magaalada dagaal beeleed, waxa uu u dhaxeeyaa dagaalkaasi laba qabiil oo kamida kuwa dega Degmada Wanla-weyn, waxaana dagaalkani uu socday maalmihii lasoo dhaafay, iyadoo tiro dad ahna ay ku dhinteen, waxaa la xaqiijiyay geerida rag ka tirsanaa kuwii dagaalka uu dhex maray iyo sidoo kale dad rayid ahaa oo aan dagaalka ku ljirin.

Tan iyo wixii ka dambeeyay burburkii dowladdii dhexe ee 1991 -kii Soomaaliya waxaa ka dillaacay dagaallo sokeeye, mar hadii maamulkii dadka u dhaxeeyay uu meesha ka baxay, qolo-qolo iyo sidii loo wada degganaa ayaa loo diriray, hantida iyo xoolahana loo kala dhacay, guryaha, gawaarida iyo wax walba oo gaar loo lahaa waa lakala qaatay sidii loo kala hub iyo saanad badnaa.

Nasiib darro iyadoo ay dowladi ka jirto soomaaliya ayaa 2020 waxaa dalka weli ka socda dagaallo sokeeye oo la isku adeegsanaayo hub culus iyo mid fudud intaba, dhawaan waxaa dagaallo lamida kuwaan ay ka dhaceen magaalada kismaayo meel u jirta 30km, sidoo kale magaalada Wanla-weyn ayey ku dagaallameen laba beelood oo halkaa wada daga.

Dagaalka ka Wanla-weyn muxuu kaga duwan yahay kuwii sokeeye ee dalka ka dhici jiray?

Dagaaladii hore ee dalka ka dhacay waxaa lakala qabsan jiray maxaabiis, waxaana dhici jirtay in maxaabiista la dilo ama dagaalka markuu dhamaado kaddib ayaa maxaabiista la weydaaran jiray, oo qolo waliba maxbuuskii ay soo qabteen ayey qolada kale ku wareejin jireen iyagoo maxaabiistoodana loo sii deyn jiray.

Wanla-weyn ma jirin wax maxaabiis ah oo lakala qabsaday, meydad ayaa lakala qabsaday, meydadkiina waxaa loo qeebiyay laba qeybood, inkastoo tiro badan aan lasoo bandhigin haddana meydadkii lagu baahiyay baraha bulshada laba fal ayaa lagula dhaqmay, kuwaasoo kala ahaa:

• Meyd xaabo dusha laga saaray kaddibna dab lagu qabtay! Iyo
• Meyd madaxa laga jaray oo Oogada qofka la dul saaray!

Subxaanallaah: Waa dhacdadii ugu xumeed ee abid taariikhda umadda soomaaliyeed ee la diiwaan galiyo, laba qabiil oo inta diriray heshiiyay waa la arkay, balse labada qabiil ee maanta ku diriray magaaladani waxaa la is weydiinayaa sida ay ku heshiin doonaan iyo xaal marinta labada dhinac dhex mari doonta sida ay noqon doonto!

Dagaal diimeedkii ka dhacay dalka ayaa sidan oo kale laga diiwaan galiyay dhacdadan oo kale, balse dagaalladii sokeeye ee dadka qabiil – qabiil ka u daggani dhexmari jiray sidan oo kale wey ku cusubtahay, taariikh ahaana Wanla-weyn waxay hoosta ka xarriiqday dhacdadan foosha xun oo aysan weli ka hadlin madaxda dalka, tahayna markii ugu horreysay ee Wanla-weyn qof la dalay haddana dab la qabadsiiyo ama qoorta laga jaro!

Maxaa la gudboon bulshada ku dhaqan Wanla-weyn?

Inta aan loo soo magacaabin guddi magac u yaal ah oo xildhibaano iyo wasiirro kasoo jeeda labada beelood aysan soo aadin dadka deegaanka ee magaalada Wanla-weyn ha isku dayaan in ay xalliyaan dhacdadan argagaxa leh ee ay dhallinyaradu ku baahiyeen baraha bulshada, iyadoo aad mooddo in lagu faanayo, alalaaska iyo sawaxanka muujinaya in loo riyaaqay dhibaatada meesha ka socota ayaa wax walba ka daran!

Maxaa laga baran karaa dhacdada nuucan oo kale ah?

Cashar weyn ayaa laga baran ddonaa dhacdadan taasoo ah:

• In umadda soomaaliyeed isku cuqdadeysan tahay weli!
• In khilaafaadkii iyo dirirtii hore ee u dhaxeyn jirtay bulshada iyo qabaa’illada soomaaliyeed uusan dhammaan!
• In magaalada uu ka dhacay falkan ay ku yar yihiin Indheer-garadka, culumada iyo hal doorrada bulshada dhexdeeda ku jira!
• In lagu sii kala fogaanayo wada dagganaashiyaha bulshada soomaaliyeed!
• In dhaqanka iyo diinta ay haystaan kuwa falkan geystay uu ka duwan yahay bulshada soomaaliyeed ee horay loo arki jiray!
• In colaadda u dhaxaysa qabaa’illada wada daggan meesha lagu gubay qoortana looga jaray meydka ay sii kororto haddii aan la helin dad wax garad ah oo ku baxa!
• In kala shaki iyo cabsi lagu noolaado meesha uu falkan ku dhacay iyo weliba deegaanada ku xeeran ee ay ku nool yihiin qabaa’illada is diriray iyo kuwa kaleba!
• In haddii uusan jirin maamul si dhaba u shaqeeya oo dadka iyo deegaankaba u caddaalad sameeya ay bulshadu waxa ay doonto sameeneyso!

Waxaan isleeyahay arrintan ku saabsan dilka, gubidda iyo bireynta waa dhacdo uguba oo bulshada soomaaliyeed ku cusub, waxaana jiray dad lagu magacaabo Biri-mageydo kuwaasoo aan la taaban jirin markii colaad ay dhacdo, hayeesheee falkan markii la arko waxaa la iska illoobayaa wax la dhaho Biri-mageydo, waxaana halis loogu jiraa in caruurta, haweenka iyo dadka waayeelka ah iyagoo nool dab la qabad siiyo si loo kala aar-guto!

W/Q: Ìman Mohamed | Iman Gurey

COVID19 KADUUDIYE KA DARAN!

20 kii sano ee u dambeeyay waxaa dalkeena laba jeer isaga soo daba noq-noqday Xanuun ay Soomaalidu ugu yeertay KADUUDIYE! Xanuunkaasi wuxuu ahaa mid saf mareen ah oo dadka intiisa badan ayuu ku dhacay, qof kastana wuxuu sugayay maalinta uu ku dhici doono, mana jirin qof ka gaashaantay ama isku dayay in uu sanka wax ku xirto, gacmahana iska dhaqo, salaantana gacantana joojiyo, dhaqtarna la xiriiro, sidoo kale ma jirin Wacyi-gelin dowlad iyo ururro caafimaadka ka shaqeeya iyo dhaqaatiirba oo ay bulshada la wadaagayaan.

Halistiisa ma badneen, wuxuu lahaa Qandho daran, luga xanuun saa’id ah, waana sababta uu u qaatay magaca KADUUDIYE oo qofka waxaa dhib ku noqday in uu istaago socodna daa warkiisa, dadka qaar way iska ilaalin jireen in ay cunaan daawo, oo qofka qaba ama uu ku dhaco xanuunka waxaa lagula talin jiray “Ha cunin Daawo haddii kale waa dhimanee!!” Soomaalidana waxay u badan yihiin dadka war ku kala qaata Talooyinka muhiimka ah, yaa aqoon ama cilmi u lehna lama dhaho markaas oo kale, waa sida ay aaminsantahay bulshadeenu.

Sanadkan billowga ah ee 2020 wuxuu la kowsaday musiibo, waxaa daaha laga rogay Xanuun lagu muran san yahay billowgiisa iyo sida uu ku billowday, Corona Virus oo dhigaal garashadiisaba loo yaqaan COVID19 ayaa shanta qaaradood ee dunida fara ba’an ku haya, 1,000,000 (Hal milyan) oo ruux ayuu ku dhacay xanuunkan, dad ka bogsaday, kuwa u dhintay iyo kuwa sariir la saaran ayey noqdeen iyagoo dhan, dalkii uu ka billowday ee Shiinaha wuxuu ku dhawaaqay in uu dabar jaray Caabuqii COVID19.

Soomaalida ku dhaqan waddamada uu gaaray xanuunkan wey sahashadeen oo waxay kasoo qaadeen kii dalkooda ku helay ama ay maqleen qaarkood ee KADUUDIYE la oran jiray, dad farabadan ayaana u dhintay oo ah soomaalida ku dhaqan waddamada Yurub iyo Ameerika. Gabar ku nool waddanka Sweden ayaa aaminsan sababta ay Soomaalida ugu badatay xanuunkan ayaa waxay ku sheegtay sidan “Soomaalida 4-5 qof ayey hal saxan wax ku wada cunayaan! Markii la xasuusiyo xanuunkana waxay ku leeyihiin annaga muslimiin ayaan nahay xanuunkan managu dhacaayo! Sidoo kale iyagoo xanuunka qaba, haddana inkirsan ayey booqanayaan dadka waayeelada ah iyo kuwa tabarta daran markaas ayey isku gudbinayaan, waana sababta ugu badan ee Soomaalida ku dhaqan Sweden ay u noqdeen bulshada xanuunkan uu halakeeyay”.

Gabar ku nool waddanka ingiriiska oo xanuunku ku dhacay ayaa iyadoo ka sheekeeneysa waxay qirtay qaladaadkii ugu badnaa ee ay sameysay in ay kamid ahaayeen In ay inkirtay xanuunka iyadoo qandho daran haysa, sidoo kalena aysan karantiilin nafteeda, caruurteedana aysan ka fogaan markii ay xanuunsantay, oo ay ku dhihi jirtay Masaaj ii samee intii ay nafta ubadkeeda ka bad baadin lahayd. Inkastoo ay hadda xaaladdeeda kasoo wanaagsanaaneyso sidii hore.

Qormadii: Ìman Mohamed